Estienne Marcel fut vérifié général maistre des Monnoyes du roy, notre sire, en France et Normendie, le XIIIIe jour d'octobre mil IIIIcXLIIII.
Sire Estienne Marcel, à présent général maistre des Monnoyez pour tout le temps passé qu'il a esté maistre particullier de la Monnoye de Rouen finissant le premier jour d'octobre MCCCCXLIIII avoit en différence ès deniers saluz d'or de LXX au marc aux armes de France et d'Angleterre ung anelet et ung point massif dedens soubz le T de YMPERAT qui est la darrière lettre devers la croix et autant soubz la lettre de X de REX qui est la darrière lettre du costé devers la pille.
Item aux angelos n'avoit aucune différence dud. Marcel.
Item Jaquet de Bresmes ouvra après lui certain temps feni le XIXe jour de novembre MCCCCXLIIII et avoit en différence soubz les lettres dessus dictez une estoille à V pointes.
Item Guillaume le Monniez et Thomasin Equenbourt, compaignons et maistres particulliers, pour II ans ensuivant fenis en octobre MCCCCXLVI ont eu en différence tant vers la croix que vers la pille ung point massif soubz la pénultime lettre c'est assavoir soubz A vers la croix de IMPERAT et soubz E de REX vers la pille.
Item Perrenot de Preaulx, maistre particullier après les dessusd. a eu différence c'est assavoir soubz les lettres desusd. ung anelet et I point dedens et pareillement a semble différence ès pénultimes lettres des angeloz vers la croix et pille.
Item ès petiz deniers noirs qui ont esté faiz par Perrenot de Preaulx en la Monnoye de Rouen de à I d. VIII grains de loy, de XIX s. III d. de taille, dont le roy donnoit VII l. 10 s. t. du marc d'argent, a pour différence une mollette entre les lettres tant du costé que d'autre et ès aultres faiz en devant de I d. XI grains de loy, de XVIII s. IX d. de taille, a ung point creux.